今年夏天熱！到！爆！

不過相信有好多bloodies 仍然計劃緊暑假出遊，或者趁夏日進行各種戶外活動，我哋準備咗一啲小貼士，希望令大家可以過得更清爽、玩得更盡興！

布衛生巾／月經褲篇

如果唔使落水，又或者唔太適應置入式嘅用品，布衛生巾同月經褲絕對係你夏天出遊嘅好伙伴！布衛生巾同月經褲一般都比較透氣，讓大家可以遠離即棄衛生巾最令人痛苦嘅噏同焗！不過如果出遊成日都要換住宿，咁又可以點樣洗布衛生巾同月經褲呢？以下嘅貼士就可以留意下啦～

建議配搭

流量大／外出時間長

🍷布衛生巾＋月經褲＋清潔用肥皂＋袋子（布袋＋密實袋）

布衛生巾有好多唔同品牌，有啲品牌有推出吸收量較大嘅日用款，讓你即使流量大嘅日子都可以擋得住！至於近年流行嘅月經褲，一條細細嘅褲仔甚至可以抵得上3塊日用衛生巾嘅吸收量，可以為防止滲漏好好把關！至於量多又外出時間長嘅日子，布衛生巾＋月經褲嘅組合絕對可以俾你到舒適又安心嘅體驗！

流量小／外出時間短

🍷布衛生巾／月經褲＋清潔用肥皂＋袋子（布袋＋密實袋）

量小嘅日子，又或者係M要嚟又未嚟、想走又未走晒嘅時候，就可以採取輕便啲嘅配搭，簡單用普通日用型布衛生巾，或者單穿月經褲，都可以應付到一般需求啦！

小提醒：

布M巾雖然比較透氣舒適，記得一樣都要至少4－6小時換一塊保持衛生呀！

適合旅行使用嘅布衛生巾／月經褲：

簡易版布衛生巾：

如果有上過我哋嘅布衛生巾工作坊，我哋同大家一齊做嘅就係簡易版嘅布衛生巾啦！佢嘅吸收層攤開就係一塊方型手巾，清洗方便而且快乾，品牌ecofemme就有推出呢種產品。就算晾出嚟都睇唔出佢係衛生巾，咁就唔使擔心尷尬啦！量多嘅時候亦可在夾層中再加手巾或吸收墊加強吸收力，非常方便。

抽取式布衛生巾：

抽取式嘅布衛生巾由一塊本體外加可替換嘅吸收墊組成，和諧生活、棉樂月事等嘅牌子都有生產呢類型嘅布衛生巾，只要本體無沾到經血，全日就只需要替換吸收墊，亦可以按流量需要增減吸收墊嘅數量，非常有彈性之餘，吸收墊亦易洗易乾，啱晒旅行期間使用！

速乾型布衛生巾
市面上有啲布衛生巾係比較易乾，例如好好棉同月亮褲嘅布衛生巾主要由聚酯纖維組成，所用嘅物料同技術都會令佢哋比一般嘅純棉布衛生巾快乾。返到酒店只需要喺沖涼嘅時候用花灑沖走經血，然後用番梘搓洗，揸乾水份就可以晾起，放喺風口位吹一晚就乾得七七八八啦！

月經褲
唔同牌子嘅月經褲其實都一樣適合旅行時候使用，一般日用款式都已經可以有兩至三塊普通日用衛生巾嘅吸收量，而且吸收後濕氣會被排走，除非流量又大又密，否則絕大部分時間都唔會覺得濕濕笠笠。台灣品牌月亮褲目前就有比較多元嘅款式同吸收量可以選擇。除咗基本嘅經典內褲款有提供日用、夜用、加長夜用等嘅款式外，佢地仲有推出平腳款同運動款等嘅月經褲，直接外穿去做運動或者做gym都冇問題！Culottée嘅月經褲一樣有好好嘅吸收力，但喺款式設計上就偏向蕾絲、蝴蝶結呢條比較性感、華麗嘅路線即使喺嚟Ｍ時都可以內外打扮得靚靚啦！

布衛生巾配備：

去一次旅行除左應該按去嘅日數同流量去決定帶嘅款式同數量之外，仲有兩樣嘢要記得：

1.清潔用品

家事梘係大家喺好旅伴，潔力強之餘又唔太佔空間，沖涼時帶埋用過嘅布衛生巾同月經褲一齊入去，沖走經血後將用家事梘輕輕搓洗，等沖完涼後只需要沖返水，就可以拎去晾乾啦，如果浴室比較大、或者時間比較充裕，可以用密實袋將搽左番梘嘅布衛生巾或月經褲放耐少少再沖水，俾時間梘嘅效力好好發揮，咁就可以清潔得更乾淨啦～如果覺得家事梘旅行期間難儲存，坊間好似月亮褲亦有推出一啲去血跡專用嘅液體洗劑，一樣方便！

2. 收納袋

棉樂悅事、Momiji Natural等唔同品牌都有推出用嚟放布衛生巾嘅收納袋，部分設計更加會設有分隔，可以用嚟分開擺放用過同未用過嘅布衛生巾，咁就可以確保衛生。部分收納袋會有手抽帶，方便拎出拎入或者掛喺門後，咁就唔怕論盡啦！唔想特登買嘢嘅朋友亦可以隨便搵個乾淨嘅袋放好未用過嘅布衛生巾一然後簡單用普通密實袋將用過嘅衛生巾放入去，減少同空氣接觸以免滋生細菌同帶來異味，就可以等返到酒店先去清洗啦。

以上就係我地嘅旅行小貼士，希望大家喺嚟Ｍ嘅時候，可以繼續享受旅途，唔會再覺得月經拖大家後腿啦～

推薦大家睇埋同系列另一篇分享，了解更多月經產品，等大家可以做最好嘅選擇：

夏日炎炎！去旅行~去戶外活動~月經裝備小貼士～月經杯／月經碟篇～